المساعد الشخصي الرقمي

مشاهدة النسخة كاملة في الموقع الأساسي مع الصور : طلال حيدر



viola
03-09-2006, 09:46 PM
مَ دام...

مَ دام
نوم ولادهن
طير ورق بالسهل....
مَ دام
ماعاد بدهن يخلوا الصبي
يدقدق جراس النحل...
مَ دام إيديك البيوت الفاضية ...
مَ دام
ما بَقْ في حدا
غير القفاص العالية
و غير الصدى ...
مَ دام
إيديك السهول....
مَ دام
بس تلملمي دَيكي...
بيتلملموا طراف الحقول
مَ دام .... مهما قلت
رح أسكت ع طول ..
ما عاد بدي قول

طلال حيدر ....

1972

viola
03-09-2006, 09:48 PM
"هـ الكان عندن بيت..."



هـ الكان عندن بيت
و صورة عليها ناس
معلقين بخيط
وقعوا عن سطوح العمر
و ستلقتن الحجار
وقعوا متل ما بيوقع المشمش
على ولاد الزغار...
وين أهلي؟
وين طاحونة حزن خيي الزغير؟
وين طيارة ورق نومي
على هزة سرير؟
وين الإيدين؟
الحطت بريق الشتي فوق الحصير
وين شبابيك
الفات منها الصوت
متل الزمهرير
وين رمان العمر
مقطوف و معلق
متل عمر الكبير
لك.. عنّ يا قلبي
متل هـ النحل
جوات القفير
وقع العمر
ما بين إيد
وبين هزات السرير...

Enleel
07-05-2007, 03:12 PM
يا ريت لو حدا يتصدق علينا بشعر ل طلال حيدر

يا راعي القصب مبحوح جايي عبالي شروقي
قللو للقصب ما يبوح بالسر اللي بعروقي
و إن ضعنا سوى بهالليل خلي صوتك مسموعي

يا رايح صوب مشرق شرق ما بو ربيعي
راحوا يرعوا غنم و العشب فوق ضلوعي
و ايام ال غابن ولفي لعدن عا صابيعي
و عتم علينا يا ليل و ضيعي يا حلوة ضيعي

قالولي إني عشقان و انا مش داري بحالي
بين الصاحي و الغفيان لمحت خيالك قبالي

كان الصبح شنو بان و اذان الصبح عالي
و نازل من صوبن مرسال و من عيني نزلوا دموعي

Nassim
07-05-2007, 03:14 PM
جبت لطلال حيدر مجموعة بدي نزلها تباعا :)

Nassim
09-05-2007, 12:33 PM
طلال حيدر


بيّاع الزمان









الإهدا


الهن..

Nassim
09-05-2007, 12:36 PM
فخّار





نيال فخارا لها الجرا



فرحان عندو عيد



بيشرب ع طوع نبيد



سكران ما عمرو صحي مرّا



ومدري خدودو ليش محمرّا



تخمين بوّس شي مرا سمرا



تما غفي ع تم هالجرا



،،،،



شو كنت يا فخار قبل بهالدني؟



كمشة تراب وعشت ما صرلك سني



لمّن جبلتك خابيي حمرا



تا عتّق نبيداتنا للعيد...



،،،،



متلك انا



كنت بزماني طين يا فخّار



صدفه مرق الله جبلني بدمعتو ... بالنار



وشوش بادني وطار



وقللّي انت فخار



يوجرّا



وشو نفع هالجرّا



لو نشفت الخمرا؟.



،،،،



هيدي الدني اسرار



بكرا نصرت ختيار



وعنّت ع بالك شي بنت سمرا



يا صاحبي تذكر انت فخّار

Ranya
09-05-2007, 01:04 PM
ليش هيك صرتي كتار
وبعدك ما حدا
وحلوه

مرة متل هالصيف حفيانة
ومرة متل غمض
وقبل ما تفتح انساني

...

Enleel
انا ممكن اكتبلك شوية قصايد من شعر طلال،
بس عندك استعداد تترجملي اياهن؟:p

Nassim
14-05-2007, 12:24 PM
كمشة ريح


بيتي ع كتف الريح

والليل ما خلاَّ ع شباكي حلم يرتاح

الحيطان عمتحكي مع الحيطان

والارض عمتسمع بكي وتنويح

مدري بأي بلاد رح تخلص الريح

متلك انا يا دار كمشة ريح


يا دار لو تمشي معي يا دار

بكرا بقولو الناس مات العندليب

وردّو ع صدرو حجار

يا ليل ما تطوّل ع خشبات الصليب

ولا نهار رح تبكي الدني ولا نهار

HUCe
14-05-2007, 12:55 PM
حب

خدني معك يا حب، شي مشوار
وع السكت وشوشني، سرار سرار
محّي لأيامي بايديك الزغار
مدري شو صابو، هالعمر
فتّح وصار قمار

يا ريت هالعمر الهرب
يرجع ونحنا صغار
لا بعود اقرا بها الكتب
ولا بعود عمّر الدار
بقشقش حواليي حطب
وبشعّل فيها النار

Ranya
15-06-2007, 09:42 AM
كان في غصن بردان

ع مرجة هلي

سألتن لمين الطقس

قالولي إلي...

وطلعت اتفقد إذا ردوا البواب

وبقيت فوق

وما حدا قللي نزلي


.

ScarLet
15-06-2007, 09:45 AM
طلال حيدر .. احلى شعر عامّي قريته!

Ranya
15-06-2007, 09:57 AM
طلال حيدر .. احلى شعر عامّي قريته!

كل ما اشتقت للبنان ولأهلي بلاقي حالي عم بركض لعنده..
كلماته بترجعني على مطارح وحدي انا اللي بعرفا..
بتشلحني بحضن الدفا..
وبترسملي ضحكات بقلبي من غير ما اتربح جميلة شحادتها بالإيام الصعبة!

HUCe
15-06-2007, 11:26 AM
وعم برسمك يل هونيك ناطرة
يا خيوط شمس من السما نازلة
بإسمك بتختزلي المطارح
بصوتك بتوقف كل المطاحن
ومن عيوني
إنتِ هل حبات الضو الطالعة


يل شفافك مغمضة عيونا ع العمر
يل عيونك عم يدّشرو البحر
ع خدودك بلون الجوري والرمل

ولما شمّ هزات شفافك وتضحكي
يا عمري لو تعرفي قديش بتصير الدني

لما تبلّش رقصة شفافك ع وجّك الأمل والمسرح
بركض بهّب متل الريح بلم شفة وبالتانية بتعبّط

وشعرك الاشقر الداشر ع كتافك
سنابل قمح
بيتعمشق عليهم الهوا
وعصافير صغار عم يترغلو
إجا حزيران

... وجايي

RITA
27-07-2007, 02:11 AM
هذه باقة من قصائد رائعة للشاعر اللبناني طلال حيدر









بعضها قد طالما سمعناه من خلال صوت مارسيل الساحر كما انشدت جارة القمر قصيدتان له هما:زهر البيلسان ويا راعي القصب...



رح حاول نزل الاغاني كمان

(سجر البن,بيتي,ركوة عرب,قومي طلعي عالبال)

هيدي القصايد







....

يا رايح



يا راعي القصب مبحوح جايي عبالي شروقي
قللو للقصب ما يبوح بالسر اللي بعروقي
و إن ضعنا سوى بهالليل خلي صوتك مسموعي
يا رايح صوب مشرق شرق ما بو ربيعي
راحوا يرعوا غنمهن و العشب فوق ضلوعي
و ايام الغابن ولفي لعدن عا صابيعي
و عتم علينا يا ليل و ضيعي يا حلوة ضيعي
قالولي إني عشقان و أني مش داري بحالي
بين الصاحي و الغفيان لمحت خيالك قبالي
كان الصبح شنو بان و ادان الصبح عالي
و نازل من صوبن مرسال و من عيني نزلوا دموعي
ركوة عرب
.. طلال حيدر
أحلى من الركوه
على منقل عرب
أحلى من الفنجان
حلوه
متل عُبي القصب
خيط القصب تعبان
جيبوا حدا من دمر
يدقدق وشم
جيبوا من الهامة
والوشم
بن محمّص وهب الهوا شامي
غمازة لعالخد
ماإلها إسم؟
والخد قدامي
ومكحلي ...
والكحل راسمها رسم
مين لبرا قلامي
ومشنشلي متل الفرس
والسرج خيّالي
بإيدا أساور من دهب
بتخش
بتخش؟
بيدور الطرب ليوم القيامة...








قومي اطلعي ع البال


.. طلال حيدر
قومي اطلعي عالبال
بِغيبتِك نزِل الشتي
قومي طلعي ع البال
في فوق سجادة صلا
والعم بيصّلوا قلال
صوتن متل مصر المرا
وبعلبك الرّجال
ع كتر ما طلع العشب بيناتنا
بيرعى الغزال
وَدّيت مع راعي حماه
يشفلي الطقس شمال
قللي السني جايي هوا
بيوَقّع الخَيّال
ياريت
ما سرجت الفرس
ولا بْعَتْ هـ المرسال



لبسو الكفافي ومشوا


.. طلال حيدر
وما عرفت مين هن..
ماعاد رح يرجعوا
ياقلب حاج تعن
لاحصان جايب حدا
ولا سرج عم بيرن
لك ضحاك
سنك دهب
خليه يبان السن
خليك متل القصب
كل ما عتق بيحن
يابن اسمك حلو
سميت حالي بن
رد العباية القصب
ع الكتف
محبوبي
والعين قوس القدح
وسيوف مسحوبة
راحو
لبسوا العتم !
قامات مهيوبة
ناديت
بالله رجعوا
ماتلتفتو صوبي








يا من حلب


.. طلال حيدر
يا من حلب
يا من الشام
هالحنة شمالية .....
حنيت ايديك
يا بو خطوط محنية
بيلبقلك التوب
والشملة الشامية
لك سحاب سيفك وغني
بتلبقلك الغنية
مكتوب ع السيف
والكلمات كوفية
مكتوب حبيت
الباقي حروف ممحية .........










.. طلال حيدر



حب

خدني معك يا حب شي مشوار
وع السكت وشوشني سرار
محي لأيامي بأيديك لصغار
مدري شو صابو هالعمر
فتح وصار قمار
ياريت هالعمر الهرب
يرجع ونحنا صغار
لاعود بقرا بهالكتب
لابعود عمَر دار
بقشقش حواليي حطب
وبشعل بهالنار

فخار

نيال فخارا لها لهجرة
فرحان عندو عيد
بيشرب عطول نبيد
سكران عمرو ما صحي مرة
ومدري خدودو ليش محمرة
تخمين بوس شي مرة سمرا
تما غفي ع تم هالجرة..



سجر البن

بيني وبينك سجر البن
وحب الهال
وزهر النوم
بيني وبينك تسع جبال
وعرب وصحرا
وغيبة يوم
بيني وبينك ضربة رمح
وفرس وسيف
وهجم الصبح


بيني وبينك طيرة طير
نادو ا كلن عالفراق
وقطفني متل الصبير
صوت الغنو بالعراق
لو نقدك كان بمدينة
وبالشام العرس
لاركب عالفرس
وجبلك مفتاح القدس
رايح اسرقلك غابة
اسرقلك جان
وعلق ع سجر البن
عقود المرجان
.................................................. ...........................................

YarBaaM
27-07-2007, 08:16 PM
الله يخليكي ريتا اذا بتقدري تلاقيلي
صوتك مرق علمسافي و سلم عليها
ما صدقت انو مرء تشافت الحني عايديها
مشكورة

RITA
27-07-2007, 10:01 PM
الله يخليكي ريتا اذا بتقدري تلاقيلي
صوتك مرق علمسافي و سلم عليها
ما صدقت انو مرء تشافت الحني عايديها
مشكورة
رح حاول لاقيها للقصيدة من كل بد ...
تكرم:)

YarBaaM
27-07-2007, 11:23 PM
يعني انو اذا لقيتيها رح ارجع اطلب منك 2 تانيين شكرا

Ranya
24-10-2007, 07:23 PM
هـ الأرض جايي مدودخه
بتهزّ ع الميلين
ع كتر ما هي خفيفه
بيحملوها تنين
وزغيّره
طير الحمام بيقطعا بيومين
ع قد منا زغيّرة
خمنتها بعدين...

جبتلّها شمس وقمر من سكر
ونجمات زرقا معلّقا
بترد عنها العين
ع قد ما سُكرا حِلو
بيلبقلها إسمين

دقت على باب الزمان
مضيّعه ليلين
تتسألو ان كنن إلو
قام ضيّفا نهارين
وقللي الزمن ما تقلّها
صاروا كحل بالعين..

Ranya
24-10-2007, 07:31 PM
فوتي على خيالِك
تا سكّر عليكِ
قاعد بالمرايه
اتنقوص عليكِ

وجِّّك
سفر العسكر
متل الخنجر
متل القدس وعم تتسكّر

قوليلهن إني أنا خيالن
رح اسكن بها النوم
واتخايل قبالن

راحت اساميهن وبقيت هـ الحجار
كبروا اللي بدُّن يكبروا
وولاد بقيوا زغار

Ranya
24-10-2007, 07:38 PM
إذا بدا لكم أن الصوت بعيد
فاحذروا
أن يؤذن له بالدخول
وأنتم غياب
كان جميلاً ككنيسة شرقية
مزيّنة بصياح الديك.
حكموا بالنفي على جميع الأحزان
فطارت يمامة من القلب
وتزينت الأيام بنهار الجمعة..
كان صافيا كجميعكم

لم يعد أحد يضع بين يديه صينيّة الفصول
يا حزيناً كغربة إلى الأبد
الأرض تدور مرة واحدة .
ذهب الوقت الأول

لا أحد سوف يكشف السر.
الزمن السعيد
الحاضر المزيّن بمجيئك فجأة
الماضي الداخل إلينا منذ لحظة
في طريقه إلى المستقبل

الضعفاء يضعفون لأنهم لا يعلمون
كم ستكون جميلا طيلة أيام الصيف.

يداه مطبقتان على نجمة
والنجمة فرحانة كنقطة تفرّ عن السطر.

الانتظار يسرق الإيمان
لكن إيمانه سرق الفاجعة..

الذي لا يموت
لا يمكن إلا أن يكون وحيداً.
طوبى للذين يموتون

البزق يقيم لك قدّاساً في ساحة القلب
الريح وحلفاؤها يناولونك القربان المقدس
وأنتِ
وحيدة بين النساء.
من أين نأتي لكِ بهذه الأحزان مرة ثانية ...

Hanibaael
24-10-2007, 07:52 PM
ومازال لا بد وغنّى
ورح ترحلي
محّي الطريق..
مرسوم عالحيطان
ولد غفيان..
راكد بالحريق
قومي انعسيلو يا دني..
بلكي اذا نعستي..بفيق..

chady
24-10-2007, 10:28 PM
صوتك مرق عالمسافة وسلّم عليها
ما صدّقت إنو مرق تا شافت الحِنّة عا إيديها

قال الصوت خليكي ما دام جايي هوى
رح ضلّ ناديكي .. يا ريت نبقى سوى

تركض غزالة حافية بضوّ القمر حتى تمسّيكي
بس تحلم منامات كشّفها الهوى .. نومِك يغطيكي
وصل الخبر عا مصر .. وقفو ملوك النيل يتأهّلو فيكي

صوتك مرق يا طير قلّو يسلّم عليي
ما صدّقت إنّو مرق تا نشفت الدمعة بعينيّي

كنت تقلي غنّيلي .. غنّيت ما في حدا
وينك طِلّ مقابيلي .. صوتك صاير صدى



طلال حيدر

Ranya
01-11-2007, 10:39 AM
رسموا الصوت ع الكفّ
وحنّوا صبيع اللغة بالخط حرف وحرف
دار العرس
خشخش بسهرات الألف هـ الدفّ
والـ ح لفّت ع الخصر زنارها
لمّن حبيبا لفّ
في حرف دقّ وفات
وقفوا حروف العطف

والدال فَتحِت دارها
تستقبل بزوّارها
والها قلبا هفّ
رقصت وداخت بالهوا لحالها
والكاف تزقف كفّ
شمل اللغة ما بيجمعُه
إلا المِشِي ع الميّ
لأَنه أخَفّ

Ranya
01-11-2007, 10:50 AM
رسملي بنت حلوه
متل شي ميدنِه
وخبّي الأدان بجيبتا

ورسوم صبح
ونطّرُه ع السطر
ما يخلّي حدا ينتقوز عليها بدواير غيبتا

وركوض
في همزه بطرف هـ الخيط
أوعا تفلّتا

غطّ القلم بالبحر
ميّ كتير
لوّن نومتا

وطيّر مراكب بالهوا
وخدلك شي غفوه بدروتا

وفتَح شي قوسين
متل بنتين استحوا
وشي أرض فاضت ميتا

ورسوم بيت وباب
متل خزانة عصافير طارت درفتا
وأَد ما فيك
شبابيك العين وسّع فتحتا

تأنّى
ع شو مستعجل؟
تأنّى على العتبه
رسمها كرز
تنشوف بكلي قطفتا

ع روس صبيعا
إجت
ع الزيح نسيت دعستا
فاقت ع قصة بتنتهي بـ ألله
ورجعت نسيتا
وداروا طواحين الهوا
بـ عِنّ لما حكيتا


هبّ الهوا
تهدّى
رح تطير النقط
ويمكن تشتي ساعتا

وتركض على قوس القدح
غزلان قشعت ميِّتا

كان النعس بستان
عبّت سلتا

رفّع الخط شوي
أحلى الخيزران
ويا عين شو حلو النعس غفيان

حط الأرض ع الدفتر
وجرّ القلم ع دورتا
بيوقع برتقان القمر
ع النوم فوق مخدتا
بَرمِت الأرض كتير
يمكن حاجتا . . . .

viola
01-11-2007, 09:13 PM
حلوة..متل طلوا العرب
رح يوصلوا عالشام
وجك قبيلة بيعدت ما وصلا الاسلام
وجك متل حقلة قمح
نيال يللي نام

دقوا مهابيج البكي
وهدول يا طير الحمام

بيناتنا قوس القدح منصوب متل خيام
و من فوق قوسك يا دني
عم توقع الإيام


بيناتنا قولة غفي
والموت ريش نعام

سلم ع موتك يا هلي
بيطلعلنا نودّي سلام
خلص اللي بيني وبينكم
عم شوف متل منام

جمال وبدو رح يرحلوا
وبحكي..وما بيطلع كلام

Caramel
19-09-2008, 04:29 AM
فقير الله


وحياة روح العشب
وحياة روح المي


يشهد عليي السجر
ولو كان تحته فـــيّ ْ


لارسملك الشمس
ع صفحة سما زرقا



وشفلي فقير
يخرطش على طرافا شوي

Caramel
19-09-2008, 04:31 AM
زهر الروح



ونزلت بستان قطفلك زهر يا روح

وجبتلم منامات

أحلى من قمر مفتوح

عرفتها رح تشتي من صوتها المبحوح




خمّنت أنه منام

قرّبت وعيها

نقز منس الحمام


تفاحة الأرض
كانت ع سجر من نور
لمن قطفت الأرض
صارت لحالا تدور

Caramel
19-09-2008, 04:32 AM
هـ الكان عندن بيت..
هـ الكان عندن بيت
وصورة
عليها ناس
معلّقين بخيط
وقعوا عن سطوح العمر
وسْتلَقِتّن الحجار
وِقْعوا
متل ما بيوقع المشمش
على ولاد الزغار
وين أهلي؟
وين طاحونة حزن خيي الزغير؟
وين طيارة ورق نومي
على هزّة سرير؟
وين الإيدين؟
الحطّت اْبريق الشتي فوق الحصير
وين شبابيك
الفات منها الصوت
متل الزمهرير
وين رمان السقف
مقطوف ومعلّق
متل عُمْر الكبير
لك.. عنّ يا قلبي
متل هـ النحل
جُوّات القفير
وقع العمر
ما بين إيد
وبين هزّات السرير

Caramel
19-09-2008, 04:35 AM
مـرايه
يا حلوتي
قوس القدح بينخّ تتمُرّي
وأول ما بتصير الدني مرايه
كرمالها تْمَرِّي

Memo
01-10-2008, 10:42 AM
الله الله - من ديوان "آن الأوان"
بتلبقلك المي
لا تموتي
اْغرقي بالمي
تيصير موتِك نَعَس
وتْصير
شمسِك فَيّ
وجّك جنازة
والملك مقتول
والعسكر قبالي
في ناس
عم بيحوربوا بقصر الملك
وفي ناس
ع العالي
خوفي عليكِ تكبري
و خوفي على حالي
رح تنزل عليّ الدني
و يتغرّق خيالي
ون كان
لا بد وغنى ورح ترحلوا
محّوا الطريق
مرسوم ع الحيطان
ولد حفيان
راكض بالحريق
قومي نعسيلُه يا دني
بلكي إذا نْعستي
بيفيق
يللي نطرتُه رجع
طلع الصبح صبحين
شمّيت ريحة علي
قالوا
مرق الحسين
جيبُه بيارق كربلا
وسماع ملّا آه
فردوا البيارق بالهوا
قال الهوا
ألله
ألله .. ألله
فتحلي درفتين الـ هـَ
وخللي الهوا
يختم ألف باء الهوى
بالـ هـَ
وجّك أدان الصبح
و الفاتحة اسمِك
والـ تا المربوطهْ
شريطهْ على رسمِك
وبتقول خبّيني؟!
بخبيكْ ما بين الحمد و الفاتحة
بغطّيكْ بالرحمن
من بعد ما بإيدُه
رفع للمي
بكربلا
تيشرب العطشان
قلّلا لها الميّ نزلي
من سورة الرحمن
ليش هيك صرتي كتار
وبعدِك ما حدا
وحلوه ..
مَرّه متل هـ الصيف حفيانِهْ
ومرّه متل شي بلاد كسلانِهْ
ومَرّه
متل غمِّض وقبل ما تفتِّح اْنساني
أول ما شفت النهر عمبيطوف
عرفت أيَّ منام
بدي شوف

بعلبكي
14-03-2009, 03:30 AM
سهيان
كان الطقس سهيان
ما بباله حدا
متل اللي قاعد ع الهوا
يتذكر النسيان

وما ضل في غير الزمان
وصندوق فرجة
وكل ما مرق فرجة
بيقولو كان . . .
بلاد مقوّصة
نِمْتِ
فْتكْروك ولد غفيان
تحت المي
قربّوا منّك يحاكوكِ
لقيو بحيرة مي

وجّك متل رجعة ولد
بعد الغياب
وجك
متل تلة
وعم تصرخ دياب
يا عُمْرْ
ما بيلحق يجي تيروح؟!
وجِّك
متل بيرق عزا
من بعيد عم بيلوح
إنت
بيت أهلي
ورد عم إرفعُهْ
تسيّج الحقلي

إنت بلاد مقوّصه
وعم تنقتل قَبْلي
إنتِ
وهبّط يا منام
ووعّيا متلي

واقف على سهل البقاع
ملتّم بشمله
بصرّخ
وصوتي ضايع
وقالوا الهوا قِبلي

يا بيت أهلي
يا سطيحات الحمام
يا دعس عالي
فوق تلجات المنام

بعلبكي
18-03-2009, 10:07 PM
بيتي
متل ورقة احترق
ما عاد عندي أهل
شبهتك بهاالسهل
بقرص العسل
عملو ع مهلوا النحل

شبهتك بحالك
بالعمر
ماشي وراك يلملم خيالك

وجك طقس متل الصحو
دايخ ومش سكران
متل الشتي
نازل على حزيران
شبهتك بقوس القدح
جايي على لبنان

وجِّك وطاف النيل
غرق مصر
في مملكة عم تنسرق
مفتوح باب القصر

وجك
من هون بيحدو الشتي
ومن هون حده التلج

وشاعر
حمل حاله بها الموت وحده وهج

شبهتك بكل الدني
من بعدك عليها السلام
بس تفرحي
بيطير من صدري الحمام
وبس تزعلي
ع مصر باخدلك الشام

karlosterrorist
27-06-2009, 09:46 AM
لبسوا الكفافه ومشوا
:che:

بعلبكي
20-07-2009, 09:46 PM
قطفولو ورد

متل ها النسيان جايي من السهول
الحب.. متل الموت
وليالي الضيعة بين الحجار تقول
رح يوصلّون هالصوت .. ؟
تحت الشتي عم ينحنو يقطف وراق النار
ابكي عليهون يا عتبة الدار..
قوليلهون فلو قوليلهون ضلو.. والليل بيفتح قمار قمار
والفلاحين الطالعين من الندي بيرنخو.. أرض المنام الباردة..
بعدون عا الورقات زخات الشتي
فرو هاالعصافير وضل لحالو يغني الزمهرير
قطفولو ورد للنسيان
الموت عم بيشكشك وراقو عا شريط الزمان .
هل كان عندون بيت ..


وصورة عليها ناس معلقين بخيط
وقعو عن سطوح العمر وسلقتون الحجار
وقعو متل ما بيوقع المشمش عا الولاد الصغار
وين أهلي وين طاحونة حزن خيي الصغير
وين طيارة ورق نومي عا هزت سرير
وين الأيدين الحطت بريق الشتي فوق الحصير
وين اللقي راسو عا أيدي وصفن .. وطلع وعلى كتير
وين شبابيك الي فات منها الصوت متل الزمهرير
وين .. رمان السقف مقطوف ومعلق متل عمر الكبير
ولك عن يا قلبي متل ها النحل جوات القفير
وقع العمر ما بين أيد وبين هزات السرير

بعلبكي
25-07-2009, 12:04 AM
صهيل الفرس


سامع صهيل الفرس وينو عريس الزين
خيال برج الأسد أسمر كحيل العين
والصوت صوتوا ومش عرفان جاي منين
بس يلتفت بيقشع متل لمعة برق وبينسحب سيفين
بس يضحك بيضوي على وجه الدني صبحين
بيشبه بيت أهل النبي معصوم عالميلين
بين هالغابات الي زرعتها بلبنان
بيطلع على وجهك قمر من سورة الرحمن
وعيسى بيلاقي النبي المعراج بلبنان
ما بينغمد سيف حتى يرجع الجولان
اليوم عرسك قوم استقبل الزوار
قوس القزح عجبينك ومفتوح باب الدار
الراية حملها بصدروا جعفر الطيار
والسيف سيف الأسد هالحيدر الكرار
والدار دارك وانت الوعد يا بشار

بعلبكي
21-08-2009, 10:32 PM
حزن الميدنة ( المأذنة )

أوعا تسمّوها
بتحزن ميدنة
بيوقع أدان العصر

وبينسرق سيف النبي
وما بيلتقى بمصر

إنت الشام مزيّنة
وإنت قواس النصر

وقفوا العرب ع سلاحهن
لمن فردت الشَعر..

تمنيت حالي دهب
تاصير متل الشام

وتغار مني حلب
وما عود فيي نام

هـ الموت ع ضهر الفرس
مارق بهالإيام

والناس
ع كتر النعس
كل ما مرق بتنام

barby
17-03-2010, 01:24 AM
من ألبوم .. كتبتني :



ياريت فيي انهدى ..
هالوقت ما عندو وقت .. ينطر حدا ..
والعمر صار جنون ..


صرنا متل شي خط بريشة قصب ..
وهوي متل حرف العرب ..
مرفوع بالضمة
منصوب بالفتحة
وبالفتحة هرب ..


بس .. يكترو ببالو
بيصيرو ... واو ... ونون ..
بس يسكن بحالو ..
بيصير همزة .. أو بيصير سكون ..


هالأرض اسوارة الدهب ..
فيني مضواية
جبلي بطريقك حلق ..
إدني معراية ..


وصيت صايغ مصر
قلي الحلق جاية ..


وضاعت .. ضاعت ..
ضاعت يا مين يلاقيا ..


يا مين يلاقيا
وياخد هالمراية ..



http://www.6rbtop.com/listen.php?song_id=41866&type=au&q=hi (http://www.6rbtop.com/listen.php?song_id=41866&type=au&q=hi)
--
ألحان وغناء : جاهدة وهبة .. كلمات: طلال حيدر .
--